27.01.2013 - 18:50
Preammulo
‘O populo ‘e Catalugna, pe’ tramente d”a storia soja, ave mmustato democraticamente ‘a vuluntà soja ‘e s’autoguvernà, cu ‘a ntenzione ‘e migliurà ‘o prugresso, ‘o bbuonessere e ‘a guaglianza d’accasione ‘e tuttuquante crestiane, e p”o rinforzo d”a cultura propria e ‘a identità cullettiva soja.
L’autoguverno ‘e Catalugna piglia fonnamiento pure d”e deritte storiche d”o populo catalano, int”e istituzione nzeculore soje e int”a tradizione juridica catalana. ‘O parlamientarismo catalano ave ‘e fonnamiente suoje int’o Medioevo, cu ‘e assemblee ‘e Pace e Mazzafranca (Pau i Treva) e d”a Corte Contale.
Int’o seculo XIV s’è criata ‘a Deputazione d”o General oppure Generalitat, ca se pigliaje chiano chiano cchiù autonomia ‘nfi’ a che se ne aizaje, pe’ tramente d”e secule XVI e XVII, cumme guverno d”o Principato ‘e Catalugna. ‘A carutta ‘e Barcellona ‘o 1714, aropp”a Guerra ‘e Successione, pruvucaje ca Filippo V abbolesse cu ‘o Decret”e Nova Planta ‘o deritto pubbrecco catalano assieme cu ‘e istituzione d’autoguverno.
Sta via storica s’è fatta spartuta cu ‘ate pizze, fatto c’ave cumbinato nu spazio ncommune lenguistico, culturale, sociale, economico, cu ‘a vocazione ‘e s”o astipà e s”o prumuovere ncopp”a mutua ricanoscenza.
Durante tutt”o seculo XX ‘a vuluntà ‘e s’autoguvernà p”a parte d”e ccatalane è stata custante. ‘A criazione d”a Mancomunità ‘e Catalugna ‘o 1914 significaje nu primmo passo d”o ricupero d”autoguverno, ca fuje abbolita p”a dittatura ‘e Primo ‘e Rivera. Cu ‘a proclammazione d”a Siconda Repubbreca spagnuola se fuje costituito nu guverno catalano ‘o 1931 cu ‘o nome d”a Generalitat ‘e Catalugna, ca fuje dutato ‘e nu Statut’ d’Autonomia.
A Generalitat fuje n’ata vota abbolita ‘o 1939 p”o generale Franco, ca stabbelette nu regime dittatoriale nfin”o 1975. ‘A dittatura cuntava cu na resistenza attiva d”a parte d”o populo ‘e d”o Guverno ‘e Catalugna. Uno d”e passe d”o cumbate p”a libbertà è ‘a criazione d”Assemblea ‘e Catalugna l’anno 1971, primma ca se recuperasse ‘a Generalitat, cu carattere provvisorio, cu ‘a turnata ‘o 1977 d”o presidente suojo all’essilio. Int”o cagnamento democratico, e int”o contesto ‘e nu nuovo sistema autonomista definito p”a Costituzione spagnuola d”o 1978, ‘o popolo ‘e Catalugna appruvaje pe’ mmiez”e nu referendum ‘o Statuto d’Autonomia ‘e Catalugna ‘o 1979, e celebraje ‘e primme elezione p”o Parlamiento ‘e Catalugna ‘o 1980.
Int”a ll’urdem’anne, p”a via d”avanzamento democratico, ‘a cchiù part”e putere politiche e sociale catalane hanno prumuosso mmisure ‘e cagnamento d”o marco politico e juridico, ‘a cchiù ricente fuje definita int”o pruciess”e riforma d”o Statuto d’Autonomia ‘e Catalugna, accuminciato p”o Parlamiento ll’anno 2005. ‘E difficoltà e negative p”a parte d”e istituzione d”o Stato Spagnuolo, nfra chesti s’adda signalà ‘a Settenzia d”o Tribbunale Costituzionale 31/2010, significano na negativa radicale all’evoluzione demmocratica d”e vuluntà cullettive d”o populo catalano int”o Stato Spagnuolo e criano ‘e base ‘e n’aggravamento d”autoguverno ca ogge se fà vedé cu tutt”a chiarezza int”aspette politiche, competenziale, finanzere, sociale, culturale e lenguistiche.
‘E diverse manere, ‘o populo ‘e Catalugna ave mmustato ‘a vuluntà soja d’abbencere ll’attuale situazione ‘e ngrippamiento int”o core d”o Stato Spagnuolo. ‘E manifiestazione a chiorma d”o 10 luglio ‘e 2010 cu ‘o titulo “Simme na Nazione, nuje decidimme” e chella a ll’11 ‘e settembre ‘e 2012 cu ‘o titulo “Catalugna nuovo Stato d’Europa” songh”e spiecazione d”o refutto d”a cittadinanza nfronn”a manca ‘e rispetto ê decisione d”o populo ‘e Catalugna.
Cu data 27 ‘e settembre ‘e 2012 pe’ bbia d”a risoluzione 742/IX, ‘o Parlamiento ‘e Catalugna confermaje ‘a cunvenienza ca ‘o populo ‘e Catalugna putesse determinà cu libbertà e democraticamente ‘o futuro cullettivo suojo pe’ bbia ‘e na conzurta. Ll’urdeme elezzione a ‘o Parlamiento ‘e Catalugna d”o 25 ‘e nuvembre ‘e 2012 hanno spiecato e confermato sta vuluntà ‘e na forma chiara e verace.
Pe fravecà stu pruciesso, ‘o Parlamiento ‘e Catalugna, aunito int”a primma sessione d”a X legislatura, e c”a representazione d”a vuluntà d”a cittadinanza ‘e Catalugna, spiecata democraticamente a ll’urdeme elezzione, formula ‘a dichiarazione ccà vasc’:
Dichiarazione ‘e suvranità d”o populo catalano
D’accordo cu a vuluntà spiecata democraticamente d”a parte d”o populo ‘e Catalugna, ‘o Parlamiento ‘e Catalugna cunviene ‘accumincià ‘o pruciesso p”apparecchià ‘a pratteca d”o deritto a decidere nfi’ a ch’e ccrestian”e Catalugna putessero decidere ‘o futuro politico cullettivo suojo, d’accordo cu ‘e prencipie successive:
-Suvranità. ‘O populo ‘e Catalugna ave, pe’ raggiun”e legitimità democratica, carattere ‘e soggetto politico e juridico suvrano.
-Legitimità democratica. ‘O pruciess”e pratteca d”o deritto a decidere sarrà scrupulosamente democratico, cu ‘a garanzia speciale d”a pluraletà d’opzione e ‘o rispetto a tuttuquante, pe’ bbia d”a deliberazione e dialogo int’o core d”a società catalana cu ‘objettivo ca ‘o prununciamento ca resultasse fosse ‘a spiecazione maiuritaria d”a vuluntà popolare, ca sarrà ‘a garanzia funnamentale d”o deritto a decidere.
-Trasparenzia. Se pruvederranno tutte quante strumiente ca ce vulessero cu ‘a fine ca tutt”a populazione e ‘a società civile catalana tenesse tutt”a nformazione e ‘a canuscenza precisa p”a pratteca d”o deritto a decidere e se prumuosse ‘a partecipazione soja int’o pruciesso.
-Dialogo. Se parlarrà cu ‘o Stato spagnuolo, ‘e instituzione europee e tuttaquant”a cummunetà internazionale.
-Coesione sociale. S’assicurarrà ‘a coesione sociale e territoriale d”o paese e ‘a vuluntà spiecata in differenti vvote p”a società catalana ‘e s’astipà Catalugna cumme nu populo sulo.
-Europeismo. Se defennerranno e prumuoverranno ‘e prencipie funnazional”e l’Unione Europea, specialement”e deritte funnammental”e ccrestiane, ‘a democrazzia, ‘o cumprumesso cu ‘o stato d”o bbuonessere, ‘a soliedaretà tra ‘e diverse popule d’Europa e ‘o mpegno p”o pruggresso economico, sociale e culturale.
-Legalità. S’usarranno tutt’e marche legale esistente pe’ fa’ effettivo ‘o rinforzo democratico e ‘a pratteca d”o deritto a decidere.
-Ruolo prencipale d”o Parlamiento. ‘O parlamiento cumme istitucione ca representa ‘o populo ‘e Catalugna ave nu ruolo prencipale int’a stu pruciesso e perzò s’averrann”e cummenì e stabbelì ‘e ngegne ê ddinamiche ‘e fatica c”assicurano stu prencipio.
-Partecipazione. ‘O Parlamiento ‘e Catalugna e ‘o Guverno d”a Generalitat hanna fà partecipe attive int’a stu pruciess”o munno locale, e ‘o massimo ‘e fforze politiche, aggente economiche e sociale, e entità culturale e civiche d”o paese nuosto, e stabbelì ‘e ngegne c’assicurassero stu prencipio.
‘O Parlamiento ‘e Catalugna ‘ncuraggia ‘assieme ‘e ccittadine pe se fa’ attive ‘e pruttaguniste ‘e stu pruciesso democratico d”o esercizio d”o deritto a decidere d”o populo ‘e Catalugna.
Palazzo d”o Parlamiento, 23 ‘e jennaro e 2013
