25.01.2013 - 08:27
Prèambôlo
Lo poplo de Catalogne, tot du long de son histouère, at manifèstâ dèmocraticament la volontât de se ôtogovèrnar, atot l’objèctif d’amèlyorar lo progrès, lo bienétre et l’ègalitât d’oportunitâts de tota la populacion, et por renforciér sa prôpra cultura et sa identitât colèctiva.
L’ôtogovèrn de Catalogne se fonda étot sur los drêts historicos du poplo catalan, dens les sines enstitucions sèculiéres et dens la tradicion juridica catalana. Lo parlementarismo catalan at son fondement u Moyen-Âjo, atot les assemblâs de ‘Pau i Treva’ et de la ‘Cort Comtal’.
U sièclo XIV se crèe la ‘Diputació del General ou Generalitat’, que avouéc lo temps acquerét adés més ôtonomia tant que a fonccionar, pendent los sièclos XVI et XVII, coment govèrn du ‘Principat de Catalunya’. La chête de Barcelona en 1714, côsa de la guèrra de Succèssion, comportat que Felipe V abolésse avouéc lo ‘Decret de Nova Planta’ lo drêt public catalan et les enstitucions d’ôtogovèrn.
Ceti chemin historico est étâ comon atot d’ôtros tèrritouèros, chousa que at composâ un comon èspâço lengouistico, culturèl, sociâl et èconomico, avouéc vocacion de lo renforciér et de lo encoragiér a comenciér de la recognessence mutuèla.
Pendent tot lo sièclo XX la volontât de se ôtogovèrnar des catalanes et des catalans est étâ una constante. La crèacion de la ‘Mancomunitat de Catalunya’ en 1914 suposat un premiér pâs vers la rècupèracion de l’ôtogovèrn, que fut abolia de la dictatura de Primo de Rivera. A la procllamacion de la Seconda Rèpublica èspagnola en 1931 se constituat un govèrn catalan avouéc lo nom de ‘Generalitat de Catalunya’, que se balyét un Statut d’Ôtonomia.
La Generalitat fut tôrna abolia en 1939 du g·ènèral Franco, que enstalat un règ·imo dictatorièl jusque u 1975. La dictatura devét fére los comptos avouéc una rèsistence activa du poplo et du govèrn de Catalogne. Ètapa capitâla de la luta por la libèrtât est la crèacion de l‘Assemblea de Catalunya’ en 1971, devant que la rècupèracion de la Generalitat, atot caractèro provisuèro, avouéc lo retôrn en 1977 de son prèsident en ègzil. En la transicion dèmocratica, et dens lo contèxto du nôf sistèmo ôtonomisto ètabli de la constitucion èspagnola du 1978, lo poplo de Catalogne aprovat a travèrs referèndom lo statut d’ôtonomia de Catalogne en 1979, et tegnét les premiéres èlèccions u Parlement de Catalogne en 1980.
Los dèrriérs ans, sur la rota de l’aprofondement dèmocratico, una maj·oritât de les forces poltiques et sociâles catalanes at empulsâ mesures de transformacion du tablô politico et juridico. Ples de rècent, lo mémo procès de rèfôrma de l’Èstatut d’Autonomia de Catalunya comenciê du parlement l’an 2005. Les dificultâts et les nègacions solevâyes des enstitucions de l’ètat èspagnol, por totes bâsteye la sentence du Tribunal Constitucional 31/2010, comportont un arrét radicâl de l’èvolucion dèmocratica des voluntâts colèctives du poplo catalan dens de l’ètat èspagnol et crèont les bases por una envolucion en l’ôtogovèrn, que houé se pôt manifèstar ren que dedens ses fôrmes politiques, compètencièles, financiéres, sociâles, culturèles et lengoustiques.
D’un mouél de maniéres, lo poplo de Catalogne at manifèstâ la volontât de supèrar l’actuèla situacion de bloc a l’entèrior de l’ètat èspagnol. Les emposentes manifèstacions, cela du 10 de julyèt 2010, desot lo mot ‘Som una nació, nosaltres decidim’ (Nos sens una nacion, nosôtres dècidens) et cela du 11 de septembro du 2012, desot lo mot ‘Catalunya nou estat d’Europa’ (Catalogne nôvo ètat d’Eropa), sont l’èvidence du refus de la populacion envers la manca de rèspèct ux dècisions du poplo de Catalogne.
Lo 27 de septembro du 2012, a travèrs la rèsolucion 742/IX, lo Parlement de Catalogne constatat la nècèssitât que lo poplo de Catalogne possésse dètèrmenar librament et dèmocraticament son futur colèctif por lo méten d’una consulta. Les dèrriéres èlèccions du Parlement de Catalogne du 25 de novembro du 2012 ant manifèstâ et confirmâ ceta volontât de maniére cllâra et pas èquivoca.
Por chavonar cet procès, lo Parlement de Catalogne, rèuni en la premiére sèssion de la X lègislatura, et en reprèsentacion de la volontât de la popolacion de Catalogne manifèstâye dèmocraticament ux dèrriéres èlèccions, formule la suiventa dècllaracion de sôverenetât et du drêt dècidar du poplo de Catalogne.
Dècllaracion de sôverenetât et du drêt dècidar du poplo de Catalogne
D’acôrd atot la volontât maj·oritèra manifèstâye dèmocraticament du poplo de Catalogne, lo Parlement de Catalogne ètablét de comenciér lo procès por rendre èfèctif l’ègzèrcice du drêt de dècidar de maniére que los citoyens et les citoyènes de Catalogne posséssont dècidar lor futur politico colèctif, selon los siuvents principos:
-Sôverenetât. Lo poplo de Catalogne at, por des rêsons de legetimitât dèmocratica, caractèro de sujèt politico et juridico sôveren.
-Legetimitât dèmocratica. Lo procès de l’ègzèrcice du drêt de dècidar serat scrupolosament dèmocratico, garantissent espèciâlament la pluralitât des chouèx et lo rèspèct por tôs, por lo méten de la dèlibèracion et du dialogo u sen de la sociètât catalana, atot lo bout que lo rèsultat seye l’ èxprèssion maj·oritèra de la volontât populèra, que serat lo garant fondementâl du drêt de dècidar.
-Transparence. Se rendront disponiblos tôs los enstruments nècèssèros perce que l’ensemblo de la populacion et la sociètât civila catalana posséssont avêr tota l’enformacion et la cognessence prècisa por l’egzèrcice du drêt de dècidar et se nen encorageye la participacion a l’entèrior du procès.
-Dialogo. Se dialoguerat et se nègociyerat avouéc l’ètat èspagnol, les enstitucions eropènes et l’ensemblo de la comunôtât entèrnacionâl.
-Cohèsion sociâla. Se garantirat la cohèsion sociâla et tèrritoriâla du payis et la volontât plusiors côps manifèstâye de la sociètât catalana de mantenir Catalogne coment un sol poplo.
-Eropèismo. Se dèfendront et se encorageront los principos fondementâls de l’Union Eropèa, de façon particuliére los drêts fondementâls des citoyens, la dèmocracie, l’engagement u bienétre, la solidaritât entre los poplos d’Eropa et lo pari por lo progrès èconomico, sociâl et culturèl.
-Lègâlitât. S’utiliseront totes les possibilitâts ègzistentes por renforciér la dèmocracie et l’ègzèrcice du drêt de dècidar.
-Rolo principâl du parlement. Lo parlement, coment enstitucion que reprèsente lo poplo de Catalogne, at un rolo principâl en ceti procès et, d’ense, se devront acordar et rèalisar los mècanismos et les dinamiques de travaly que garantéssont ceti principo.
-Participacion. Lo Parlament de Catalunya et lo Govern de la Generalitat dêvont fére participants actifs en tot ceti procès tot lo mondo local, et lo ples grant nombro de forces politiques, agents èconomicos et sociâls, et entitâts culturèles et civiques du noutron payis, et rèalisar los mècanismos que garantéssont ceti principo.
Lo Parlement de Catalogne encorage l’ensemblo des citoyens et citoyènes a étre actifs et protagonistos de ceti procès dèmocratico de l’ègzèrcice du drêt de dècidar du poplo de Catalogne.
Palès du parlement, 23 de janviér du 2013
