31.03.2012 - 06:00
Jornalet, un periodic digital en occitan, sortiguèt ièr, a la velha de la manifestacion per la reconeissença de la lenga nòstra que se debana uèi a Tolosa. Lo Jornalet es estat promogut per dos catalans occitanofils, membres de l’Associacion entara Difusion d’Occitània en Catalonha (ADÒC), Jaume Clotet, jornalista, e Ferriòl Macip, responsable dempuèi d’annadas d’Info Occitan de Barcelona Televisió (BTV). Totas las variantas de la lenga occitana i son admesas, mai qu’empleguen la grafia classica.
A l’egard de la lenga, ditz Clotet, l’occitan nos apareis mancat d’un lengatge jornalistic establit: ‘Alara, probable que serem sovent los primièrs d’emplegar qualques tèrmes, es atal qu’avèm lo sosten excepcional d’un grop de filològs e de linguistas occitans que nos conselharan totjorn.’
Dins lo Jornalet, contunha de dire Clotet, a mai d’editorial, de nòvas e d’una seccion d’opinion, i a de vinhetas, d’enquèstas e, sustot, una carta del temps: ‘Aquò suspren fòrça los occitans, qu’an pas mai visibilisat la carta de lor país. Parièrament, l’aparicion del jornal Avui, amb sa primièra carta del temps dels Païses Catalans, foguèt una sòrta de truc per mantunes catalans.’ Ne cal destacar, al delà, las categorias e las etiquetas de las informacions, amb lo País d’Òc devesit en de regions e parçans istorics, e pas segon las divisions oficialas francesas. ‘Aquò nos a engatjats a far de recèrcas importantas, perque atals divisions son pas recuelhidas enlòc d’una manièra rigorosa.’
L’idèa del jornal, que lo sèti fisic es a Tolosa e qu’amassa un malhum creissent de collaborators e de correspondents benevòls, virava dempuèi de temps dins lo cap de Jaume Clotet: ‘L’Occitània es un país desvertebrat de tot punt de vista. Los occitans sabon quitament pas çò qu’es un espandi de comunicacion nacional, quicòm que nosautres ne discutissèm e i trabalham dempuèi d’annadas. Es atal que pensèri que los occitans avián besonh d’un jornal nacional que contribuisca a los vertebrar, que lor presente l’informacion d’un punt de vista nacional, en lenga d’òc. Ni mai ni mens. Es pas un acte politic, donc, es un acte de normalitat.’
Lo Jornalet se finançarà sonque de publicitat. Per ara es estat plan ben acuelhit de las autoritats, especialament del Conselh Generau d’Aran e de la Direccion Generala de Politica Linguistica de la Generalitat de Catalonha, que ne son venguts anonciaires. I a, en plus d’aquò, de contactes amb la Comuna de Tolosa e la Region Miègjorn-Pirenèus.
Enllaços
Array
Array
